Shyǵys Qazaqstanda kene shaqqan adam sany 3 myńnan asty
ShQO Sanıtarııalyq-epıdemıologııalyq baqylaý departamenti baspasóz qyzmetiniń málimetine súıensek, óńirde keneniń taralý maýsymy sáýir aıynda bastalǵan.
Sodan beri 3083 adamdy kene shaqty. Keneden zardap shekkenderdiń eń kóbi Óskemen qalasynda (44 paıyz), odan keıin Rıdderde (21 paıyz), Altaı aýdanynda (12 paıyz) jáne Katonqaraǵaı aýdanynda (11,5 paıyz).
«Alty adam kene entsefalıtimen aýyrdy. Olar Taýly Úlbi aýylynyń, Rıdder qalasynyń, Kamenka jáne Ýrýnhaıka aýyldarynyń turǵyndary. 6 adamnyń tek bireýi ǵana der kezinde medıtsınalyq kómekke júgingen», - delingen aqparatta.
Aıta keteıik, Shyǵys Qazaqstan oblysy respýblıkada kene entsefalıtin juqtyrý qaýpiniń «joǵary» aımaǵyna jatady. Óńirde aýrýshańdyq deńgeıi Qazaqstan boıynsha ortasha kórsetkishten 4,1 ese joǵary.