Shyǵys Qazaqstanda qazan aıyna deıin 747 myń adam vaktsına alady

ÓSKEMEN. QazAqparat – Shyǵys Qazaqstan oblysynda qazan aıyna deıin 747 myń adam koronavırýsqa qarsy vaktsına alady dep kútilýde, dep habarlaıdy QazAqparat tilshisi.

ShQO densaýlyq saqtaý basqarmasy basshysynyń orynbasary Elmıra Rahymbaevanyń aıtýynsha, búgingi tańda óńir boıynsha 420 myńnan astam adam vaktsınanyń birinshi komponentin alǵan.

Al ekinshi komponent 288 myń adamǵa egildi.

«Vaktsınatsııalaý protsesi josparǵa sáıkes júrip jatyr. Osy aıda taǵy 145 myń vaktsına jetkizý josparlanǵan. Oblysta «Spýtnık V» vaktsınasy bar. Turǵyndar keıbir aýrýhanalardan «CoronaVac» vaktsınasyn ala alady. Sondaı-aq otandyq «QazVac» vaktsınasynyń 10 myń dozasynyń jetkizilýin kútip otyrmyz», - dedi Elmıra Rahymbaeva.

Onyń aıtýynsha, aımaq boıynsha 300 ekpe pýnkti jumys isteıdi. Qazan aıyna deıin oblystaǵy 747 myń adam vaktsına alady dep kútilýde.