Shyǵys Qazaqstanda karantın talaby 26 márte buzylǵan

ÓSKEMEN. QazAqparat – Shyǵys Qazaqstan oblysynda shekteý sharalaryn buzýdyń 26 faktisi tirkeldi, dep habarlaıdy QazAqparat tilshisi.

Óńirde arnaıy qurylǵan monıtorıngilik toptar shekteý sharalarynyń saqtalýyn qadaǵalaý úshin qoǵamdyq kólikterde, dúkenderde, dárihanalar men basqa da mekemelerde kún saıyn reıd júrgizýde.

«14 naýryzda Óskemende 205 obekti tekserildi. Nátıjesinde karantın talaptaryn buzýdyń 11 faktisi tirkelgen. Semeıde júrgizilgen reıdter barysynda 228 nysan qamtylǵan. Tekserýler kezinde 15 buzýshylyq tirkeldi. Onyń ishinde saýda úılerinde, bazarlarda maska taqpaǵandar boldy», - delingen ShQO Aqparat ortalyǵy taratqan málimette.

Osy rette, monıtorıngilik top ókilderi óńir turǵyndaryna karantın talaptaryn qatań saqtaý qajettigin eskertedi.

Esterińizge sala ketsek, 13 naýryzda Shyǵys Qazaqstanda shekteý sharalaryn saqtamaǵandarǵa 1 mln teńgeden astam aıyppul salynǵany habarlanǵan.