Shyǵys Qazaqstanda qar qursaýynda qalǵan 64 adam qutqaryldy
ÓSKEMEN. QazAqparat – Shyǵys Qazaqstan oblysynda qar qursaýynda qalǵan 64 adam qutqaryldy, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, aldyn ala jasalǵan daýyldy eskertýge qaramastan óńir turǵyndary alys jolǵa shyǵýda.
Tarbaǵataı, Kókpekti jáne Altaı aýdandaryndaǵy jol ýchaskelerinde 30-dan astam avtokólik qarǵa batyp qalǵan.
Qutqarýshylar shuǵyl kómekke attanyp, 64 adamdy evakýatsııalady.
«Eń qıyn jaǵdaı Altaı aýdanynda bolǵan. Qar qursaýynda qalǵan kólikterden 52 adam, onyń ishinde 6 bala qutqaryldy. Eshkim medıtsınalyq kómekke muqtaj bolǵan joq», - dep habarlady vedomstvo ókilderi.
Kókpekti aýdanyndaǵy Baıbýra ýchaskesinde qutqarýshylar 3 avtokólikti qardan shyǵardy. Kólikterde 9 adam bolǵan.
«Osy rette óńir turǵyndaryna daýyldy eskertý jasalǵan kezde alys saparǵa shyqpaý qajettigin eskertemiz. Joldardyń jaı-kúıin «Dármen» mobıldi qosymshasy arqyly tekserip otyrǵan abzal. Eger jolda qıyn jaǵdaıǵa tap bolsańyz, dereý «112» nómirine habarlasý qajet» delingen málimette.
