Shyǵys Qazaqstanda qar kóshkinine baılanysty úsh jol jabyldy

ÓSKEMEN. QazAqparat – Shyǵys Qazaqstan oblysynda qar kóshkini qaýpine baılanysty úsh jol jabyldy, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, óńirdegi úsh tasjolda qar kóshkini túsýi yqtımal.

«Respýblıkalyq mańyzy bar «Óskemen-Altaı-Úlken Naryn-Katonqaraǵaı- Rahman qaınarlary» tasjolynyń 6-166 shaqyrymynda (Ýshanov aýyly men Altaı qalasynyń aralyǵy), oblystyq mańyzdaǵy «Óskemen-Taýly Úlbi-Soltústik» tasjolynyń 30-37 shaqyrymynda jáne «Óskemen-Tarǵyn-Samar» tasjolynyń 88-145 shaqyrymynda kóliktiń barlyq túri úshin qozǵalysqa tyıym salyndy», - delingen aqparatta.

Osy rette, qutqarýshylar óńir jurtshylyǵyna alys saparǵa shyǵar aldynda joldardyń jaı-kúıin «Dármen» mobıldik qosymshasy arqyly tekserip otyrýǵa keńes berdi.