Shyǵys Qazaqstanda qar kóshkini joldy tolyqtaı jaýyp qaldy
ÓSKEMEN. QazAqparat – Shyǵys Qazaqstan oblysynda qar kóshkini júrdi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 4 sáýirde saǵat 10.00-de «Óskemen-Rahman qaınary» tasjolynyń 435 jáne 437 shaqyrymdarynda kóshkin júrgen.
«Jalpy kólemi 360 tekshe metr qar joldy tolyqtaı jaýyp tastady. Abyroı bolǵanda, zardap shekken eshkim joq. Qazirgi ýaqytta jolda avtokóliktiń barlyq túrleri úshin qozǵalysqa shekteý engizildi. Sol jerde «QazAvtoJol» JShS qyzmetkerleri jumys isteýde», - dep habarlady vedomstvo ókilderi.
Aıta keteıik, «Qazseldenqorǵaý» ShQ fılıalynyń mamandary qys bastalǵaly beri jasandy jolmen 128 490 tekshe metr qar túsirgen.
