Shyǵys Qazaqstanda iri esirtki arnasynyń joly kesildi

ÓSKEMEN. QazAqparat – Shyǵys Qazaqstan oblysynyń polıtseıleri iri esirtki arnasynyń jolyn kesti, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, tártip saqshylary óńir aýmaǵyna marıhýana jetkizýmen aınalysqan er adamdy ustap, iri esirtki arnasynyń jolyn kesti.

«Jedel-izdestirý sharalaryn júrgizý barysynda Óskemende kópqabatty úılerdiń biriniń aýlasynda esirtki zattaryn satý úshin saqtaǵan 39 jastaǵy azamat ustaldy. Ol memleketaralyq izdeýde júrgen bolyp shyqty. Turǵylyqty jerine tintý júrgizý kezinde polıtseıler ótkir ıisi bar qońyr-jasyl tústi ósimdik tektes zat salynǵan 790 polıetılen oramany tapqan», - delingen aqparatta.

Saraptama qorytyndysyna sáıkes, tárkilengen zat jalpy salmaǵy 28 keliden asatyn keptirilgen marıhýana bolyp shyqty.

Qazirgi ýaqytta er adam ýaqytsha ustaý ızolıatoryna qamaýǵa alynǵan.

Atalǵan fakti boıynsha QR QK-niń 297-baby 3-bóligimen sotqa deıingi tergeý amaldary júrgizilýde.

Esirtki saýdasymen aınalysqan adam 10-nan 15 jylǵa deıingi merzimge bas bostandyǵynan aıyrylýy múmkin.

Foto: ShQO polıtsııa departamenti