Shyǵys Qazaqstanda hırýrgııalyq qural-saımandar shyǵarylýy múmkin
Óńirde medıtsına salasyn damytý úshin shetelden zamanaýı jabdyqtar satyp alynyp, aq halattylar Eýropa elderine biliktilikterin arttyrýǵa attanyp jatyr. Otandyq medıtsınalyq óndiris te nazardan tys qalmaǵan. Shyǵys Qazaqstanda hırýrgııalyq qural-saımandar shyǵarý kózdelýde. Bul úshin Óskemendegi D.Serikbaev atyndaǵy ShQTÝ men Semeı medıtsınalyq ýnıversıteti kelisimge kelip otyr.
«Medıtsınalyq ýnıversıtettiń tıisti patenti bar. Olar bizge habarlasyp, osyndaı joba usyndy. Hırýrgııalyq ota jasaıtyn qural-saımandardyń túrin-túrin jasaý josparlanǵan. Biraq ol úshin tıisti jabdyqtar qajet. Qazir eki ýnıversıtet aqyldasyp, atqarylatyn jumys algorıtmin quryp jatyrmyz. Sodan keıin qarjy bóletin ınvestor izdeımiz», - dedi D.Serikbaev atyndaǵy ShQTÝ QEAQ basqarma tóraǵasy - rektorynyń mindetin atqarýshy Sáýle Rahmetýllına.
Esterińizge sala keteıik, osyǵan deıin tehnıkalyq ýnıversıtettiń ǵalymdary adam aǵzasyna arnalǵan medıtsınalyq ımplanttar jasap jatqanyn habarlaǵan edik.