Shyǵys Qazaqstanda grýzııalyq dárigerler sheberlik saǵatyn ótkizip jatyr
Shyǵysqazaqstandyq «Ana men bala» ortalyǵynyń dárigerlerin Grýzııanyń akýsher-gınekologtary oqytýda.
2016-2019 jyldarǵa arnalǵan «Densaýlyq» baǵdarlamasyn júzege asyrý aıasynda Shyǵys Qazaqstandaǵy medıtsınalyq uıymdar sheteldik jetekshi klınıkalarmen jáne ortalyqtarmen yntymaqtastyqty arttyrýda. Bul joly «Ana men bala» ortalyǵyna Grýzııanyń «Gagua Clinic», «Kuzanov Clinic» klınıkalarynyń dárigerleri keldi.
Oblystyq densaýlyq saqtaý basqarmasynyń bastyǵy Marat Shoranovtyń aıtýynsha, Grýzııa ana men bala ólimin tómendetýde aıtarlyqtaı jetistikterge qol jetkizgen.
«Biz TMD-nyń barlyq elderimen tyǵyz jumys isteımiz. Taldaý kezinde Grýzııada akýsherlik-gınekologııalyq profıl óte jaqsy damyp jatqanyn bildik. Olardan úırenetin nárse kóp. Sondaı-aq, transplantologtarymyzdy Belarýs eline jibergen kezde, Keńes zamanynan bergi transplantologııanyń negizgi mektebi sol eldiń aýmaǵynda bolǵanyn bildik»,-deıdi Marat Shoranov.
Grýzın dárigerleri sheberlik sabaǵy barysynda balalar arasynda jıi kezdesetin aýrýlardy talqylady. Osylaısha, pedıatrlar dıagnoz qoıý, aýyrsynýdy baǵalaý, rınosınýsıttiń emdeý, tynys joldarynyń ınfektsııasy, sondaı-aq ırratsıonaldy antıbıotıkalyq terapııa boıynsha jańa usynystardy talqylady. Sheberlik sabaǵynan keıin «Ana men bala» ortalyǵynyń qyzmetkerleri emdeý kezinde halyqaralyq usynystarǵa súıenetin bolady.
Sondaı-aq, «Áýlıe Ioakım men Anna» jáne «Ana men bala» ortalyǵy arasynda strategııalyq áriptestik týraly memorandým jasaldy. Onyń sheńberinde bilim baǵdarlamalary, tájirıbe almasý, ǵylymı jobalar men is-sharalarǵa qatysý uıymdastyrylady.
Aıta keteıik, «Ana men bala» ortalyǵy jaqyn arada medıtsınalyq qyzmet kórsetýdiń 4-shi deńgeıine kóshedi. Balalar neırohırýrgııasy jáne kardıohırýrgııa qyzmeti, oftalmologııa jáne ońaltý qyzmetteri kórsetiledi. Sońǵy eki jylda 3,5 mlrd teńgeniń qural-jabdyǵy satyp alynǵan. Bıyl bul maqsatta qosymsha 1 mlrd teńge bólinedi. Jáne ortalyq dárigerleri Londonǵa baryp biliktilik arttyryp kelgen.
