Shyǵys Qazaqstanda gepatıt dertine baılanysty jańa derek shyqty
ASTANA. QazAqparat - Shyǵys Qazaqstan oblysynyń Úrjar aýdanyna qarasty Sholpan aýylyna barǵan komıssııa gepatıt «A» dertine shaldyqqandardyń sany 30-dan asqanyn naqtylady, dep habarlaıdy QazAqparat tilshisi.
«19 adam týraly aqparat eshqaıda jiberilmegen, sondyqtan statıstıkaǵa kirmeı qalyp, ortalyqtan 12 adam dep shyqqan. Búgin qujattardy qarasaq, 19 adam osy jerde «A» gepatıtine shaldyǵypty. Ázirge biz teksergen qujat boıynsha 30 bolyp tur. Oblystan suraǵan kezde negizgi statıstıkadan qarap otyrady ǵoı. Olar da bilmeıdi ár aýylda qansha bolyp jatqanyn. Biraq aqparat bermegeni ol árıne, durys emes boldy», - deıdi QR DSM Qoǵamdyq densaýlyq saqtaý komıteti epıdemıologııalyq qadaǵalaý basqarmasynyń basshysy Roza Qojapova.
Alaıda jergilikti turǵyndar sary aýrýǵa shaldyqqandardyń sany 50-ge jýyqtaǵanyna senimdi. Tipti dárigerdiń móri basylyp, aýyrǵan balalardyń tizimi kórsetilgen qujatty da komıssııaǵa kórsetti. Al medıtsına qyzmetkerleriniń salǵyrttyǵynan balamnyń derti asqynyp, sary aýrýdan kóz jumdy degen Indıra Jánibekova dárigerlerdi sotqa berdi. Alaıda 11 jastaǵy qyzynan aıyrylǵan ana is burmalanyp ketedi me dep úreıli.
Sondaı-aq, sholpandyqtar aýyrǵan balalarynyń ambýlatorııalyq kartalary jappaı túzetilip jatyr dep dabyl qaǵýda. Endi naýqastardyń naqty sanyn jasyrý, ambýlatorııalyq kartalardy ózgertý jáne bala ólimine qatysty qylmystyq is te respýblıkalyq komıssııamen tekserilip, qorytyndysy quqyq qorǵaý organyna beriledi.
Esterińizge sala keteıik, buǵan deıin Sholpan aýylynda 49 balanyń gepatıt «A» dertine shaldyqqany joqqa shyǵarylyp, tek 12 balanyń aýyrǵandyǵy jóninde aqparat jarııalanǵan bolatyn. Sondaı-aq QR Densaýlyq saqtaý mınıstrligi Qoǵamdyq densaýlyq saqtaý komıtetiniń tóraǵasy, bas sanıtarlyq dáriger Jandarbek Bekshın Astanada ótken brıfıngte 12 balanyń gepatıtke shaldyǵýynyń sebebin aıtqan edi.
