Shyǵys Qazaqstanda elektromobıl qurastyratyn zaýyt salynýy múmkin
Shyǵys Qazaqstanǵa kólik qurastyrýmen aınalysatyn qytaılyq GEELY kompanııasynyń ókilderi keldi. Olar ShQO ákiminiń orynbasary Darhan Sapanovpen jáne beıindi basqarmalardyń basshylarymen kezdesý ótkizdi.
Kezdesý barysynda eki jaqty yntymaqtastyq múmkindikteri talqylandy. Qytaı eliniń kásipkerleri Qazaqstanda elektromobıl óndirisin shoǵyrlandyrý josparlary týraly aıtyp berdi. Bul turǵyda Shyǵys Qazaqstan basymdyǵy joǵary óńir retinde sanalyp otyr.
«Qazaqstanda óndiristiń osy túrin ınvestıtsııalaý boıynsha josparymyz bar. Naryqty taldap, jan-jaqty zertteý júrgizilip jatyr», - dedi Zhejiang Geely New Energy Commercial Vehicle Development CO LTD aımaqtyq dırektory Hýan Shın.
Kompanııa ókilderiniń aıtýynsha, olar qazaqstandyq naryqqa jeńil elektr kólikterin ǵana emes, jolaýshylar avtobýstaryn, kvadrokopterlerdi jáne basqa da ónerkásiptik tehnıkany usyna alady.
«Biz óndiristi ShQO-da shoǵyrlandyrý boıynsha ózara yntymaqtastyqqa múddelimiz. Óńirimizde avtomobıl jasaý tájirıbesi men barlyq qajetti ınfraqurylym bar. Sonymen qatar geografııalyq jaqyndyqty jáne salynyp jatqan avtojoldy eskersek, yntymaqtastyqtyń bolashaǵy zor. Aýyl sharýashylyǵyn, atap aıtqanda ónimdi tereńdetip óńdeýdi damytý biz úshin mańyzdy. Bul baǵyt ta zertteýge turarlyq», - dedi oblys ákiminiń orynbasary Darhan Sapanov.
Eske salsaq, osyǵan deıin qytaılyq kompanııanyń Abaı oblysynda da elektromobıl qurastyratyn zaýyt salýǵa nıetti ekeni habarlanǵan.