Shyǵys Qazaqstanda eki jylý ortalyǵyndaǵy jóndeý jumystary qatań baqylaýda
ShQO ákimdiginiń málimetine súıensek, aldaǵy jylytý maýsymyna daıyndyq jumystary qazirdiń ózinde bastalyp ketken. Aımaq basshysy Danıal Ahmetov aýdan, qala ákimderine barlyq jylý kózderin jóndeý boıynsha jobalyq-smetalyq qujattamany daıyndaýdy tapsyrdy.
«Osy maqsatqa qajetti aqsha men atqarylatyn jumystardyń tizbesin memlekettik sarapshylar bekitýi tıis. On kún ishinde qala, aýdan ákimderi barlyq jylý elektr ortalyqtaryn tekserip, olardy jóndeý boıynsha smetalar jasaýy kerek. Taǵy bir mańyzdy másele - jylý kózderindegi gıdravlıkalyq rejımdi tekserý. Bul rette, Sogra jáne Óskemen JEO-daǵy jóndeý jumystary erekshe baqylaýǵa alynǵan», - deıdi oblys ákimi.
Óz sózinde ol jeke menshik ıeleri barlyq mindettemelerdi oryndaıdy dep úmittenetindigin jetkizdi.
«Sebebi jańa jylytý maýsymyna 100 paıyzdyq daıyndyqpen kirýimiz qajet. Kómirmen qamtamasyz etýge keletin bolsaq, 1 tamyzǵa deıin qatty otyn 50%, al 1 qyrkúıekke deıin 100% jetkizilýi kerek. Byltyrǵy tájirıbeni paıdalanyp, kómir jiberý pýnkterinde dúrbeleńdi boldyrmaý shart. Sondaı-aq men kommýnaldyq kásiporyndar aldyndaǵy qaryzdardy óteý boıynsha halyqpen jumys júrgizýdi tapsyrdym», - deıdi Danıal Ahmetov.