Shyǵys Qazaqstanda eki jigit taýda adasyp ketken
ÓSKEMEN. QazAqparat – Shyǵys Qazaqstan oblysy Rıdder qalasynda taýda adasqan eki jigit izdestirildi, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine sensek, 3 qazan kúni saǵat 18.30-da jergilikti JShS-nyń biriniń dıspetcherinen Gromotýha ózeni aýmaǵynda eki er adamnyń adasyp ketkendigi jaıly habar túsken. Birden sol jaqqa qutqarýshylar men polıtsııa qyzmetkerleri attandy.
«Bul aýmaq qaladan 13 shaqyrym qashyqtyqtaǵy taýly-ormandy jer bolyp shyqty. 18 jastaǵy jigitter kúzgi ormannyń sulýlyǵyn tamashalaý úshin taýǵa shyǵyp, adasyp qalǵan. Qas qaraıyp ketkendikten olardy tabý qıynǵa soqty. Alaıda buǵan qaramastan izdestirý jumystary úzbeı júrgizilip, jigitter 2 shaqyrymdaı jerdegi Gromotýha ózeniniń sol jaǵalaýynan tabyldy», - dep habarlady vedomstvo ókilderi.
Er adamdar polıtsııa qyzmetkerlerine jetkizildi. Olar medıtsınalyq kómekti qajet etken joq.
Sońynan anyqtalǵandaı, olar tańerteń saǵat 9-da tabıǵat aıasynda jaıaý serýendeýge shyqqan. Alaıda alakeýim tartqan shaqta qaıtar joldy taba almaı taba almaı qaldy.
Osy rette, qutqarýshylar taýǵa shyqqan kezde qaýipsizdikti basty nazarda ustap, ózińmen birge qol shamyn, alǵashqy kómek qobdıshasyn, tamaq pen jyly kıim alyp shyǵý kerektigin eske salady.
