Shyǵys Qazaqstanda eki jeńil kólik muz astyna túsip kete jazdady
ÓSKEMEN. QazAqparat - Shyǵys Qazaqstan oblysyndaǵy «Qyzyl tý» parom ótkeli mańynda ÝAZ-3909 jáne «Lada Granta» avtokólikteri jartylaı sýǵa batty.
Kómekke kelgen qutqarýshylar adam shyǵynyń aldyn aldy. Alaıda bir mashına áli de muz astyna ketýi múmkin, ázirge ony bóreneler ustap tur. Oqıǵanyń sebebi muz ústinde qaýipsizdik erejelerin saqtamaý bolyp otyr - muz ádettegi normadan eki ese juqa, dep habarlady QazAqparat tilshisine Shyǵys aımaqtyq aeromobıldi jedel qutqarý jasaǵy (ShAAJQJ).
ShAAJQJ mamandary ólshem júrgizip, muz qalyńdyǵynyń 15-18 santımetrden aspaıtynyn anyqtady. Jeńil kólik úshin muz qalyńdyǵy 25 sm kem bolmaýy tıis, al júk kólikteri ótý úshin 45 sm-den kem bolmaýy tıis.
«Qysqy ýaqytta oblys sýlaryndaǵy adam ómirin saqtaý kórsetkishteri úlken qaýip týdyrýda. Muz ústindegi oqıǵanyń jaýapty tulǵalar tarapynan qadaǵalanbaýy jáne kólik júrgizýshileriniń tártipti buzýy jyl saıyn sýdaǵy tótenshe oqıǵalarǵa ákep soǵady. Balyqshylarǵa, júk tasymaldaýshylarǵa jáne esh qorqynyshsyz muz arqyly jolyn qysqartqysy kelgen jolaýshylarǵa muzdyń áli qatpaǵany týraly mindetti túrde eskertý qajet», - dedi ShAAJQJ bas qutqarýshysy Anatolıı Rojkov.
TJ departamenti parom ótkeliniń jumys istep turǵanyn taǵy da eske saldy jáne basa aıtty. Jergilikti atqarý organdary muz ótkelderin ázirlegen soń ǵana, qatqan sý betinen ótýge ruqsat etiledi. 
