Shyǵys Qazaqstanda eki jedel járdem mashınasy qar qursaýynda qaldy
ÓSKEMEN. QazAqparat - Znamenka aýylynda gazdan ýlanǵan otbasyny qutqarýshy dárigerler qar qursaýynda qaldy. Eki jedel járdem mashınasynyń jolyn kúrtik qar kesti. Olarǵa Semeı qalalyq JB-45 mamandary arnaıy tehnıkany qoldaný arqyly kómekke keldi. Olar der kezinde 2 jedel járdem mashınasyna kómek kórsetti, dep habarlaıdy «QazAqparat» HAA tilshisi.
7, 9 jáne 13 jastaǵy úsh balasy bar erli-zaıyptyny Semeı qalalyq aýrýhanasynyń dárigerleri tekserip, úılerine jiberdi.
Buǵan qosa, osy demalys kúnderi TJ qyzmeti úsh ret apatty-qutqarý operatsııasyna bardy. Shyǵys óńirlik aeromobıldik jedel-qutqarý jasaǵynyń qutqarýshylary Qaraqoja aýylyndaǵy ana men balasyn qutqardy. Bir jarym jasar qyzdyń temperatýrasy joǵarylap, appendıtsıt bolýy múmkin degen kúdik týdy. ÓAJQJ qutqarýshylary ana men balany, sondaı-aq medıtsınalyq kómekke muqtaj eki adamdy jetkizdi.
