Shyǵys Qazaqstanda eki et óńdeý kombınaty salynady
ASTANA. QazAqparat - Shyǵys Qazaqstan oblysynda et jáne et ónimderin óńdeıtin eki kombınat salynady. Ótken jyldyń qorytyndysy boıynsha oblysta 105% ósimmen 270 myń tonna et óndirildi, bul respýblıkalyq úlestiń 15%. Nátıjesinde, Shyǵys Qazaqstan el ishinde ekinshi orynda tur. Bul týraly turǵyndar aldyndaǵy esebinde óńir basshysy Danıal Ahmetov aıtty.
Oblystyń ekonomıkalyq damý deńgeıiniń basym baǵyttarynyń biri - agrarlyq sektor. Máselen, eksport áleýetin arttyrý úshin aımaq mal sharýashylyǵyn damytýdyń keshendi baǵdarlamasyn iske asyrýda. Al etóndirý jáne óńdeý isi óńir eksportyn aldyńǵy qatarǵa bastaýy tıis.
«Eń bastysy, básekelestikke bastar múmkindikterdi paıdalana otyryp, artyqshylyqtardy tıimdi qoldaný. Sondyqtan joǵary sapaly daıyn ónimder naryǵyna shyǵý úshin «Evrazııa AgroHoldıng» JShS avstralııalyq kompanııasymen tize qosyp, Aıagóz aýdanynda et óńdeıtin kombınat salý jumystary júrgizilýde. Budan bólek, bizdiń taraptan nysanǵa 468 mln teńgege barlyq qajetti ınfraqurylym júrgizilip, jobalyq-smetalyq qujattama ázirlenip jatyr», - dedi ShQO ákimi.
Sondaı-aq aımaq basshysynyń baspasóz qyzmetinen málim etkendeı, búginde «AgroPortal» JShS ırandyq kompanııanyń qatysýymen Semeıde et óńdeý kombınatynyń qurylysy boıynsha iri ınvestıtsııalyq jobany júzege asyrýǵa daıyn. Osy rette ótken jyldyń sońynda QR IDM Investıtsııalar komıteti men «AgroPortal» JShS arasynda ınvestıtsııalyq kelisimshartqa qol qoıylǵandyǵyn atap ótken jón.
Sonymen qatar Shyǵys Qazaqstanda halyqaralyq standarttar boıynsha aýyl sharýashylyǵy ónimderin suryptaýdyń búkil jıyntyǵyn júzege asyratyn zerthana ashylady. Aımaq basshysynyń aıtýynsha, «Qytaılyq standarttar boıynsha sertıfıkattaý - aspanasty eliniń naryǵyna aparatyn tóte jol».
«Biz úshin Qytaı naryǵy mańyzdy. Qazirgi kúni oblysta qazaqstandyq ónimderdi qytaılyq standart boıynsha sertıfıkattaý zerthanasyn qurý jumystary júrgizilýde. Osy másele boıynsha bıyl qańtarda Qytaı Halyq Respýblıkasynan bir top mamandar bizdiń oblysqa kelip qaıtty. Zerthanany ornalastyratyn ǵımarat daıyndalýda. Quny mıllıardtan astam teńge bolatyn qondyrǵyny jetkizý jumysyn qazan aıynda bastaımyz», - dedi aımaq basshysy.
Aıta ketý kerek, bul zerthana eldegi biregeı ortalyq bolmaq.
