Shyǵys Qazaqstanda eki balyqshy ózenge batyp ketti
ÓSKEMEN. QazAqparat - Abaı aýdanyndaǵy Rysaı ózeninde qaıǵyly jaǵdaı boldy. Eki balyqshy ýaqyttyń kesh, kúnniń sýyq ári jeldiń kúsheıip turǵanyna qarmastan ózenge balyq aýlaýǵa attanǵan. Jaǵalaýdan 50 metr jerde olardyń qaıyqtary aýdarylyp qaldy, dep habarlaıdy QazAqparat Shyǵys Qazaqstan oblystyq tótenshe jaǵdaılar qyzmetine silteme jasap.
50 metr jaǵalaýdan asa qashyq jer emes, degenmen balyqshylardyń ózderimen alyp shyqqan zattarynyń kóptigin, aýa raıynyń buzylýyn, kúnniń sýyqtyǵyn nazarǵa alǵanda, olardyń sýdan aman shyǵýy ekitalaı bolaty. Júkti onsyz da shekten tys kóp alyp alǵan olardyń ústilerinde qutqarýshy quraldar da bolmaǵan. Sýǵa ketkenderdiń biriniń denesin balyqshylar taýyp alǵan jáne olar qutqarýshylardy shaqyrǵan, ekinshisiniki kelesi kúni tań ata sýdan shyǵaryldy.
Qutqarýshylardyń málimetterine qaraǵanda, balyqshylar sýda júrý erejesiniń birden úsh talabyn buzǵan. Birinshiden, olar, sýǵa qutqarý quraldarynsyz shyqqan. Ekinshiden, sýda júzetin qurylǵyny túnde paıdalanǵan. Úshinshiden, qaıyqqa shekten tys kóp zattar tıegen. Osyndaı nemquraıdylyqtyń saldarynyń sońy kisi ólimine alyp keldi.
