Shyǵys Qazaqstanda demalys kúnderi 7 órt boldy
ÓSKEMEN. QazAqparat – Shyǵys Qazaqstan oblysynda ótken demalys kúnderi 7 órt shyqty, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, Semeıde jeke turǵyn úıdiń aýlasyndaǵy sharýashylyq qora-jaı órtengen. Oqıǵa ornyna shuǵyl kelip jetken qutqarýshylar jalpy aýdany 70 sharshy metrdi alyp jatqan jalyndy sóndirdi.
«Sondaı-aq ekinshi qabattaǵy páterde balkonnyń aǵash qurylymdary, esik-tereze bloktary men jeke zattar jandy. Órt 3-qabattaǵy kórshi páterdiń balkonyna da jaıylyp ketken. Órtti sóndirýge 6 tehnıka men 19 adam jumyldyryldy. Aldyn ala málimet boıynsha órttiń shyǵý sebebi – otty abaısyz qoldaný», - delingen aqparatta.
Saıajaıda shyqqan jalyn 40 sharshy metr aýmaqqa taralǵan. Órt shatyrdy, tereze-esik bloktaryn, jeke zattardy, jıhaz ben turmystyq tehnıkany sharpydy. Ottyń shyǵýyna - peshti salý jáne paıdalaný kezinde qaýipsizdik talaptaryn saqtamaý sebep boldy.
«Dál osyndaı sebeppen Shemonaıha aýdanynda órt shyqty. Tselınnaıa kóshesindegi jeke turǵyn úıdiń edeni men shatyry jandy. Órt sóndirýshiler jalpy aýdany 20 sharshy metrdi quraǵan tilsiz jaýdy óshirdi. Sondaı-aq Kókpekti, Ulan aýdandary men Óskemen qalasynda turǵyn úılerde órt bolǵan», - delingen málimette.
