Shyǵys Qazaqstanda demalys kúnderi 11 órt oqıǵasy tirkeldi

ÓSKEMEN. QazAqparat – Shyǵys Qazaqstan oblysynda demalys kúnderi 11 órt oqıǵasy tirkelgen, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, 25-26 qyrkúıek kúnderi turǵyn úı sektorynda 11 ret órt shyqty. Onyń ishinde 5 jer úıdi jáne 6 sharýashylyq qora-jaıdy qyzyl jalyn sharpyǵan.

Peshti ornatý jáne paıdalaný kezinde órt qaýipsizdigi talaptaryn saqtamaý saldarynan – 5, otty abaısyz qoldanýdan – 4, elektr jabdyqtaryn montajdaý jáne paıdalaný barysynda qaýipsizdik erejelerin buzýdan – 2 órt boldy. Tilsiz jaý Óskemen, Semeı qalalarynda, Glýbokoe, Kókpekti, Kúrshim, Ulan jáne Shemonaıha aýdandarynda tirkelgen.

«Eń iri órt – Ulan aýdanynda shyqqan. Jer úıdegi jalynnyń jalpy aýdany 100 sharshy metrdi qurady. Oqıǵa ornyna shuǵyl kelip jetken órt sóndirýshiler otty tolyqtaı aýyzdyqtady. Órttiń shyǵý sebebi – elektr jabdyqtaryn montajdaý jáne paıdalaný kezinde qaýipsizdik talaptaryn saqtamaý», - dep habarlady vedomstvo ókilderi.