Shyǵys Qazaqstanda demalys bazasynan shyqqan iri órt aýyzdyqtaldy
ÓSKEMEN. QazAqparat – Shyǵys Qazaqstan oblysy Glýbokoe aýdanyndaǵy demalys bazasynda shyqqan iri órt sóndirildi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, búgin tańǵy saǵat 07.00 shamasynda Glýbokoe aýdanyndaǵy demalys bazalarynyń birinde órt shyqqan.
Belgili bolǵandaı, taý shańǵysy jabdyqtaryn jalǵa beretin ǵımarattyń aǵash qurylymdary otqa orandy.
«Oqıǵa ornyna órt sóndirýshiler shuǵyl kelip jetti. Qutqarýshylar tilsiz jaýdyń kórshiles ornalasqan basqa nysandarǵa taralýyna jol bermedi. Kóp uzamaı jalpy aýdany 140 sharshy metrge jetken qyzyl jalyn tolyqtaı aýyzdyqtaldy. Zardap shekken eshkim joq», - delingen aqparatta.
Órtti sóndirýge jeke quramnan 16 adam men 4 tehnıka jumyldyryldy.
Ottyń shyǵý sebebi – elektr jabdyqtaryn montajdaý jáne paıdalaný kezinde órt qaýipsizdigi talaptaryn saqtamaýdan bolýy múmkin.
