Shyǵys Qazaqstanda daryndy balalar marapattaldy

ÓSKEMEN. QazAqparat – Shyǵys Qazaqstan oblysynda 1 maýsym – Halyqaralyq balalardy qorǵaý kúnine oraı daryndy balalar marapattaldy, dep habarlaıdy QazAqparat tilshisi.

Óńirde daryndy oqýshylar forýmy ótti. ShQO bilim basqarmasynyń basshysy Saırangúl Jumadilova daryndy balalardy aımaq basshysynyń atynan maqtaý qaǵazdarymen jáne baǵaly syılyqtarmen marapattap, balalardy qorǵaý kúnimen quttyqtady.

«Prezıdent Qasym-Jomart Toqaev osy jyldy Balalar jyly dep jarııalaǵany belgili. Ártúrli konkýrstar men jarystarda Shyǵys Qazaqstan oblysynyń balalary joǵary nátıjelerge qol jetkizip júr. Bıylǵy oqý jylynyń ózinde olar halyqaralyq jáne respýblıkalyq baıqaýlarda 208 medal jeńip aldy. Onyń ishinde 60 altyn, 66 kúmis, 82 qola medal bar», - dedi ol.

Balalardy qorǵaý kúnine oraı uıymdastyrylǵan saltanatty sharada respýblıkalyq jáne óńirlik olımpıada jeńimpazdary men júldegerleri marapatqa ıe boldy.

Oqýda, shyǵarmashylyqta jáne sportta joǵary jetistik kórsetken daryndy balalarǵa da qurmet kórsetildi.

«Búgingi forýmnyń maqsaty – balalarymyzdy yntalandyrý. Barlyq bala oblys ákiminiń atynan aqshalaı jáne baǵaly syılyq aldy. Mundaı baıqaýlar balalardyń odan saıyn damı túsýine jol ashady», - dedi Saırangúl Jumadilova.

Aıta keteıik, forýmǵa oblystyń 100-den astam oqýshysy qatysty.