Shyǵys Qazaqstanda dala órtimen kúres jalǵasyp jatyr
ÓSKEMEN. QazAqparat – Shyǵys Qazaqstan oblysynyń birqatar aýdanynda dala órtimen kúres jalǵasýda, dep habarlaıdy QazAqparat tilshisi
ShQO tótenshe jaǵdaılar departamenti baspasóz qyzmetiniń málimetine súıensek, Kúrshim aýdanynda «Marqakól» orman sharýashylyǵy, «Bobrovka» ormanshylyǵy jáne Tósqaıyń aýyldyq okrýgi aýmaǵynda shóp, buta, men aǵash órtenip jatyr.
Tilsiz jaýdyń jalpy aýdany – 1800 gektar.
«Jaqyn ornalasqan eldi mekenderge tónip turǵan qaýip joq. Sol jerde qyzyl jalynmen 307 adam men 35 tehnıka damylsyz kúresip jatyr. Sondaı-aq 4 tikushaq tartylyp, áýeden 28 ret sý tógildi», - delingen aqparatta.
Altaı aýdanynda dala órtiniń aýmaǵy 2400 gektarǵa jetip otyr. Sol jerde jedel shtab jumysy uıymdastyryldy.
Órtti aýyzdyqtaýǵa barlyǵy 367 adam men 35 tehnıka jumyldyrylǵan.
«Katonqaraǵaı aýdanynda da órttiń beti qaıtpaı jatyr. Altynbel aýylynan 12 shaqyrym jerde shyqqan ottyń aýdany – 1900 gektar. Órt oshaǵynda 355 adam, 29 tehnıka, MI-2 tikushaǵy jumys isteýde. Budan bólek, Quıǵan aýyldyq okrýginde 300 gektardy sharpyǵan dala órti de áli aýyzdyqtalmady», - delingen habarlamada.
