Shyǵys Qazaqstanda dala órti 237 gektar aýmaqty sharpydy
ÓSKEMEN. QazAqparat – Shyǵys Qazaqstan oblysynyń órt sóndirýshilerine demalys kúnderi tilsiz jaý jaıly 112 ret habar túsken. Onyń 66 jaǵdaıynda - shóp, al 25-inde - qoqys órtendi, dep habarlady QazAqparat tilshisi.
ShQO TJD baspasóz qyzmetiniń málimetine súıensek, órttiń negizgi sebepteri – qoqys jaǵý men otty abaısyz paıdalaný. Eń úlken aýmaqty sharpyǵan dala órti Besqaraǵaı aýdanynda boldy. Qyzyl jalyn 40 gektar shópke jaıylǵan. Tilsiz jaýdy aýyzdyqtaýǵa 3 órt sóndirý bóliminiń qyzmetkerleri men jergilikti atqarýshy organdardyń ókilderi jumyldyryldy. Al Altaı aýdanyndaǵy demalys bazalarynyń mańynda shyqqan órttiń aýmaǵy 30 gektardy qurady.
Sondaı-aq Óskemen men Semeı qalalarynda, Kúrshim, Zaısan, Katonqaraǵaı, Kókpekti jáne Ulan aýdandarynda dala órtengen. Jalynnyń jalpy aýmaǵy – 237 gektar.
«Óńirde kún ysyp ketkendikten shópti órt shalý qaýpi artty. Kóp jaǵdaıda buǵan turǵyndardyń ózderi kináli bolyp jatady. Kólik terezesinen laqtyrylǵan temeki tuqyly men bir ǵana-aq sirińke alapat órtke ákelip soǵýy múmkin. Sondyqtan halyqqa órt qaýipsizdigi erejelerin qatań saqtaý kerektigin eskertkim keledi. Eger shóptiń janyp jatqanyn baıqasańyz birden «101» nómirine qońyraý shalýyńyzdy suraımyz», - deıdi ShQO TJD Órt sóndirý jáne avarııalyq-qutqarý jumystary qyzmeti bastyǵynyń orynbasary Azamat Muqashev.
