Shyǵys Qazaqstanda dala órti 20 gektar aýmaqty sharpydy
ÓSKEMEN. QazAqparat – Shyǵys Qazaqstan oblysy Zaısan aýdanynda 20 gektar dala órtenip jatyr, dep habarlaıdy QazAqparat.
ShQO tótenshe jaǵdaılar departamenti baspasóz qyzmetiniń málimetine súıensek, kún sýytyp, qar aralas jańbyr jaýsa da, Zaısan aýdanynda shóp órtengen.
«9 sáýir kúni saǵat 19.00 shamasynda tútindi baıqaǵan aýyl turǵyndary órt sóndirý qyzmetine habar bergen. Sol jaqqa qaraı birden 7 órt sóndirýshi men jergilikti atqarýshy organnan 5 adam attandy. Qatty jeldiń saldarynan olar kelip jetkenshe tilsiz jaý 20 gektar dalaǵa taraǵan», - dep habarlady vedomstvo ókilderi.
Qyzyl jalynnyń shyǵý sebebi – otty abaısyz paıdalanýdan bolýy múmkin. Osy rette TJD ókilderi turǵyndardy órt qaýipsizdigi erejelerin qatań saqtaýǵa jáne órt shyqqan jaǵdaıda birden «101» nemese «112» nómirlerine dereý habarlaýǵa shaqyrady.
