Shyǵys Qazaqstanda bıýdjet qarajaty 99,7 paıyzǵa ıgerilgen
Baspasóz qyzmetinen habarlanǵandaı, oblystyq bıýdjette paıdalanylmaǵan qarajattyń 410,6 mln teńge kóleminde qaldyǵy bar. Sonymen birge, birqatar aýdandar men oblys ortalyǵy 6,4 mln teńge kóleminde aqshany ıgerip úlgermegen. Aımaqtyń qarjy basqarmasynyń bergen málimetine sáıkes, oǵan jumyspen qamtý baǵdarlamasy boıynsha jańa bıznes ıdeıalaryn júzege asyrýǵa arnalǵan grant erejeleriniń bekitilmeýi, sondaı-aq memlekettik satyp alý turǵysynda bolmaı qalǵan konkýrstar sebep bolyp otyr.
Atalyp ótkendeı, jergilikti bıýdjetke 346,1 mln teńge qaıtarylǵan. Oblys ákimdiginde birqatar basqarmalardyń basshylary túsindirgendeı, oryndalǵan jumystar, taýardy jetkizý týraly qujattardyń bolmaýy, memlekettik satyp alý boıynsha bolmaı qalǵan konkýrstar men sot óndiristeri saldarynan 41,9 mln teńge ıgerilmeı qalǵan.
«Konkýrstyq protsedýralar ekinshi jartyjyldyqta da qarajatty ıgerý máselesine yqpalyn tıgizýi múmkin. Máselen, Semeıge jaqyn Aqsaı kentindegi sý qubyry qurylysyna qatysty konkýrs shildede ǵana jarııalanatyn bolady. Sonymen birge, óńirde jalpy quny 2,7 mlrd teńgege 17 jospar boıynsha konkýrstyq protsedýralar áli de jalǵasyn taýyp jatyr. Jalpy, jyldyń sońyna deıin oblys boıynsha 192,7 mlrd teńgeni ıgerý kózdelgen», - deıdi Shyǵys Qazaqstan oblystyq qarjy basqarmasynyń basshysy Lázızá Kenjetaeva.
Óz kezeginde aımaq basshysynyń orynbasary Erlan Aımuqashev jaýaptylarǵa 15 tamyzǵa deıin ýaqtyly konkýrstardy ótkizý kerektigin eskertti.
«Ony sozbaqtaýdyń qajeti joq. Jergilikti bıýdjetterdiń kirisi boıynsha jyldyq boljamdy oryndaý turǵysynda ýaqtyly ári qarjynyń ıgerilmeýi táýekelderine qatysty sharalardy qabyldaý kerek», - deıdi ol.
