Shyǵys Qazaqstanda bulan atqan eki adam ustaldy

ÓSKEMEN. QazAqparat – Shyǵys Qazaqstan oblysynda eki er adam bulan atqan, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, tártip saqshylary Rıdder qalasynyń prokýratýrasy jáne orman sharýashylyǵy jáne janýarlar dúnıesi aýmaqtyq ınspektsııasynyń qyzmetkerlerimen birlesken reıd barysynda zańsyz ańǵa shyǵý faktisi anyqtaldy.

Brakonerlikpen aınalysqan Rıdder qalasynyń eki turǵyny bolyp shyqty.

«Ekeýi bulannyń óleksesin soıyp jatqan jerinen ustalǵan. Qazirgi ýaqytta olarǵa qatysty tergeý amaldary júrgizilip jatyr» dep habarlady vedomstvo ókilderi.

Aıta keteıik, atys qarýyn qoldana otyryp zańsyz ań aýlaǵandar 3000 AEK-ke deıin aıyppul tóleýge nemese sol mólsherde túzetý jumystaryna tartylýy jáne 3 jylǵa deıin bas bostandyǵynan aıyrylýy múmkin.