Shyǵys Qazaqstanda brakonerlerden 2 tonnadan astam balyq tárkilendi

ÓSKEMEN. QazAqparat – ShQO Polıtsııa departamenti baspasóz qyzmetiniń málimetine súıensek, tártip saqshylary óńir aýmaǵynda zańsyz balyq aýlaýǵa tosqaýyl qoıý maqsatynda «Ýyldyryq-2022» jedel aldyn alý sharasyn ótkizdi. Bir jarym aıdyń ishinde tabıǵatty qorǵaýǵa baǵyttalǵan 340 reıd júrgizilgen. Sonyń nátıjesinde, 9 qylmys anyqtaldy, dep habarlaıdy QazAqparat tilshisi.

«Balyq resýrstaryn qorǵaý salasyndaǵy zańdy buzǵan 287 adamǵa jalpy somasy 4 500 000 teńgeden astam aıyppul salyndy. Polıtseıler quqyq buzýshylardan 2000 keliden astam zańsyz aýlanǵan balyqty, 32 balyq aýlaý quralyn, onyń ishinde 3300 metr tor men 3 qaıyqty tárkilendi. Osynyń saldarynan memleketke keltirilgen shyǵyn kólemi 11 mln teńgeden asady», - delingen departament aqparatynda.

Máselen, polıtsııa qyzmetkerleri Buqtyrma sý qoımasynda «Krym» markili qaıyqqa minip brakonerlikpen aınalysqan Kúrshim aýdanynyń 52 jastaǵy turǵynyn ustady. Er adamnan túrli balyq salynǵan bes qap tárkilendi. Balyqtyń jalpy salmaǵy – 154 keli.

Qazirgi ýaqytta kúdiktige qatysty QR QK-niń 335-baby 3-bóligine (Balyq resýrstaryn, basqa da sý janýarlaryn nemese ósimdikterin zańsyz alý) sáıkes sotqa deıingi tergeý amaldary júrgizilip jatyr.

Eske salsaq, Atyraý, Mańǵystaý jáne Batys Qazaqstan oblystarynyń sý aıdyndarynda eki aıǵa sozylǵan «Bekire-2022» balyq qorǵaý aktsııasy aıaqtaldy.