Shyǵys Qazaqstanda boranǵa baılanysty jabylǵan eki jol ashyldy

ÓSKEMEN. QazAqparat – Shyǵys Qazaqstan oblysynda boranǵa baılanysty jabylǵan eki jol ashyldy, dep habarlaıdy QazAqparat tilshisi.

ShQO Tótenshe jaǵdaılar baspasóz qyzmetiniń málimetine súıensek, óńirde osyǵan deıin jabyq bolǵan eki jol qaıta ashyldy.

«Oblystyq mańyzy bar «Altaı Alpisi–Severnoe aýyly» tasjolynyń 38-60 shaqyrymy jáne respýblıkalyq mańyzdaǵy «Óskemen-Shemonaıha-Reseı Federatsııasynyń shekarasy» tasjolynyń 15-123 shaqyrymy (Glýbokoe aýyly men Shemonaıha qalasynyń aralyǵy) kólik quraldarynyń barlyq túri úshin ashyldy», - delingen aqparatta.

Vedomstvo dereginshe, Shyǵys Qazaqstanda 3 jol áli jabyq tur. Atap aıtqanda, Óskemen qalasy men Novotroıtskoe aýylynyń aralyǵy, Shemonaıha qalasy men Úlken ózen aýylynyń aralyǵy, Taıynty aýylynan Samar aýylyna kireberis jol.