Shyǵys Qazaqstanda boranǵa baılanysty birqatar jol jabyldy
ÓSKEMEN. QazAqparat – Shyǵys Qazaqstan oblysynda boranǵa baılanysty birqatar respýblıkalyq mańyzdaǵy jol jabyldy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, aýa raıynyń nasharlaýyna, naqty aıtqanda boran men joldyń durys kórinbeýine baılanysty respýblıkalyq mańyzy bar «Glýbokoe-RF shekarasy» joly jabyldy.
«Al qar kóshkini júrý qaýpine oraı «Óskemen-Serebrıansk» tosjolynda barlyq kólik túrleriniń qozǵalysyna tyıym salynǵan. Sondaı-aq oblystyq mańyzdaǵy Taıynty men Samar aýyldarynyń arasyndaǵy jol jabyq tur», - delingen aqparatta.
Osy rette, qutqarýshylar óńir jurtshylyǵyna alys saparǵa shyǵar aldynda joldardyń jaı-kúıin «Dármen» mobıldi qosymshasy arqyly tekserip otyrýǵa keńes berdi.
