Shyǵys Qazaqstanda bıyl jer zańnamasyn buzýdyń 83 faktisi anyqtaldy
Oblys boıynsha bıyl qurylys maqsatyndaǵy jerlerdi uzaq ýaqyt paıdalanbaýǵa qatysty 36 jospardan tys tekserý júrgizildi. Bul týraly ShQO Jer resýrstaryn basqarý departamenti habarlap otyr.
«Jer zańnamasyn buzýǵa qatysty 83 fakti anyqtaldy. 1 jyl ishinde buzýshylyqtardy joıý týraly 36 nusqama berildi. Nusqama oryndalmaǵan jaǵdaıda QR Jer kodeksiniń 94-babyna sáıkes departament menshik ıelerinen jerdi májbúrlep alyp qoıý týraly sotqa talap-aryz joldaıdy», - delingen aqparatta.
Sonymen qatar «Qazaqstan Ǵarysh Sapary «UK» AQ derekteri negizinde ǵarysh arqyly profılaktıkalyq baqylaý júrgizilýde. Búginde oblys aýmaǵynda jalpy aýdany 508,8 myń gektar jaıylym men egistik jer paıdalanylmaı bos jatyr.
«Soǵan baılanysty 2 755 jer paıdalanýshyǵa jer zańnamasynyń talaptaryn buzýshylyqtardy bir jyldyń ishinde joıý týraly nusqaý joldandy. Qazirgi ýaqytta paıdalanylmaı bos jatqan 7,4 myń gektar jer memleket menshigine qaıtarylǵan», - delingen málimette.
