Shyǵys Qazaqstanda bıyl tumaýǵa shaldyqqandar byltyrǵydan áldeqaıda erte tirkeldi
ShQO sanıtarlyq-epıdemıologııalyq baqylaý departamentiniń málimetine súıensek, óńir boıynsha jiti respıratorlyq vırýstyq ınfektsııaǵa shaldyqqandar sany artyp keledi. Qazirgi ýaqytta bul ınfektsııamen 18 232 adam aýyrdy.
Sondaı-aq bıylǵy kúzde tumaý juqtyrý faktisi byltyrǵydan áldeqaıda erte, naqty aıtqanda 22 kún buryn tirkeldi.
Buǵan osy kúzdegi aýa raıynyń salqyndyǵy jáne COVID-19-ǵa qarsy shekteý sharalarynyń alynǵandyǵy sebep bolyp otyr. Barlyǵy 24 shyǵysqazaqstandyq tumaýmen aýyrǵan.
«Tumaýǵa shaldyqqandar arasynda 4 jasqa deıingi sábıden bastap, 65 jastan asqan qartqa deıingi ártúrli jastaǵy adam bar. Statıstıka boıynsha qalalar men aýdandar arasynda Óskemen eń aldyńǵy qatarda. Onda 19 adam tumaýmen aýyrǵan. Qazir barlyq naýqas saýyǵyp ketti. Tumaýdan ólim-jitim tirkelmedi, aýrýhanaǵa jatqyzylǵandar joq», - delingen aqparatta.