Shyǵys Qazaqstanda bıyl sýǵa batqandar sany 15 paıyzǵa azaıdy

Shyǵys Qazaqstan oblysynda bıylǵy shomylý maýsymynda sýǵa batqandar sany azaıyp otyr, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, qutqarýshylar bıylǵy shomylý maýsymyn qorytyndylady. Bıyl óńir boıynsha 2022 jylmen salystyrǵanda sýǵa batqandar sany 15%-ǵa azaıǵan.

«Jaz aılarynda TJD qyzmetkerleri 14 adamdy, onyń ishinde 1 balany sýdan qutqardy. Olar jergilikti atqarýshy organ ókilderimen birlesip, qaýipsizdik maqsatynda ózen-kólderdiń jaǵalaýyna 304 tyıym salý-eskertý belgisi men 24 banner ornatty», - delingen aqparatta.

Qutqarýshylar, polıtseıler men eriktiler barlyǵy 4400-den astam reıd júrgizdi. Sonyń barysynda túrli erejelerdi buzǵan 126 adam ákimshilik jaýapqa tartyldy.

«Bıyl sýǵa batqandardyń negizgi sebebi – shomylý kezinde óz kúshterin asyra baǵalaýdan. Barlyǵy oblysta 6 adam sýǵa batty. Qaıǵyly oqıǵalar túgeldeı shomylýǵa jabdyqtalmaǵan jerlerde tirkeldi. Buqtyrma sý qoımasynda 3 adam, Zaısan kólinde 2 adam, Glýbochanka ózeninde 1 adam sýǵa batyp ketken», - delingen habarlamada.