Shyǵys Qazaqstanda bıyl 700-den astam jer úı órtengen
ÓSKEMEN. QazAqparat – Shyǵys Qazaqstan oblysynyń qutqarýshylary óńir boıynsha órttiń shyǵý sebepterine taldaý jasady, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, órttiń shyǵýynyń negizgi sebepteri – otty jaǵý kezindegi salaqtyq (483 oqıǵa), elektr jabdyqtaryn paıdalanǵanda qaýipsizdik talaptaryn saqtamaý (224) jáne pesh paıdalaný kezinde órt qaýipsizdigi qaǵıdalaryn buzý (191). Jyl basynan beri óńirdegi 1145 órttiń 740-y turǵyn úı sektorynda boldy.
«Máselen, 6 qazanda saǵat 18:00 shamasynda Semeıdegi Naberejnaıa kóshesinde barak úlgisindegi turǵyn úıden órt shyqty. Qutqarýshylar kelgende úı jabyny, esigi, ishtegi jıhaz ben jeke zattardy jalyn sharpyp jatty. Órt sóndirýshiler úıden syıymdylyǵy 27 lıtrlik bir gaz ballonyn shyǵaryp úlgerdi», - delingen aqparatta.
Kóp uzamaı jalpy aýdany 30 sharshy metrdi quraǵan tilsiz jaý aýyzdyqtaldy. Aldyn ala málimet boıynsha ottyń shyǵýyna – peshti ornatý jáne paıdalaný kezinde órt qaýipsizdiginiń saqtalmaýy sebep bolǵan.
«7 qazanda Semeı qalasyndaǵy Gornaıa kóshesinde ornalasqan jeke turǵyn úıde jıhaz, jeke zattar men úı tóbesiniń aǵash qurylymdary órtengen. Órt sóndirýshiler oqıǵa ornyna shuǵyl kelip jetti. Jalpy aýdany 64 sharshy metrge jetken jalyn tolyqtaı sóndirildi. Órttiń shyǵýyna ot jaǵý kezindegi salaqtyq sebep bolýy múmkin», - delingen málimette.
