Shyǵys Qazaqstanda bıyl 43 adam jol apatynan kóz jumdy
ÓSKEMEN. QazAqparat – Shyǵys Qazaqstan oblysynda jyl basynan beri 240 jol apaty tirkelip, 43 adam mert boldy, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, jyl basynan beri óńir boıynsha 240 ret jol apaty bolǵan.
Sonyń saldarynan 338 azamat jaraqat alyp, 43 adam kóz jumdy.
«Jol-kólik oqıǵalarynyń arasynda betpe-bet soqtyǵysý, kóliktiń aýdarylýy jáne jaıaý júrginshini qaǵyp ketý jaǵdaılary bar. Kún jylynǵaly beri jol apaty jıileı tústi. Sebebi turǵyndar qala syrtyna demalýǵa shyǵyp, kólik aǵyny aıtarlyqtaı artty», - delingen aqparatta.
Taldaý nátıjeleri kórsetkendeı, jol apatynyń negizgi sebepteri – jyldamdyqty ruqsat etilgen shekteý asyrý, kólikti mas kúıde aıdaý, manevr jasaý erejelerin buzý jáne qarsy jolaqqa shyǵý ketý.
Jalpy bıyl Shyǵys Qazaqstanda eki jantúrshigerlik jol-kólik oqıǵasy boldy.
Atap aıtqanda, 8 mamyr kúni saǵat 11:20 shamasynda respýblıkalyq mańyzy bar «Omby-Maıqapshaǵaı» tasjolynyń Jarma aýdany Shar qalasynyń mańyndaǵy ýchaskesinde «Ssang Yong Actyon» men «Vaz-21014» kólikteri soqtyǵysyp, 6 adam mert boldy.
Al 22 mamyr kúni saǵat 07:40-ta «Almaty-Óskemen» tasjolynyń Jarma aýdany Qalbataý aýylynyń tusyndaǵy 959 shaqyramynda bolǵan apattan 5 adam kóz jumǵan edi.
