Shyǵys Qazaqstanda bıyl 4 myńǵa jýyq adamdy kene shaqty
ÓSKEMEN. QazAqparat – Shyǵys Qazaqstan oblysynda bıyl 4 myńǵa jýyq adamdy kene shaqqan, dep habarlaıdy QazAqparat tilshisi.
ShQO Sanıtarlyq-epıdemıologııalyq baqylaý departamenti baspasóz qyzmetiniń málimetine súıensek, osy jyly óńir boıynsha 3620 adamdy kene shaqty. Onyń ishinde 14 jasqa deıingi bala sany – 1248.
«Sondaı-aq kene entsefalıti men ıksodty kene borrelıozy tabylǵan 20 azamat aýrýhanaǵa jatqyzyldy. Statsıonar jaǵdaıynda em-dom qabyldaǵan olar tolyqtaı jazylyp shyqqan. Kene entsefalıtimen syrqattanǵandar negizinen Katonqaraǵaı aýdany men Rıdder qalasynda tirkeldi», - delingen aqparatta.
Ótken jylmen salystyrǵanda kene shaqqandar sany 4,6 paıyzǵa azaıǵan. Profılaktıkalyq maqsatta kene entsefalıtiniń vırýsyna qarsy ımmýnoglobýlın 2943 adamǵa salynǵan.
