Shyǵys Qazaqstanda bıyl 4 adam sýǵa ketken
ÓSKEMEN. QazAqparat – Shyǵys Qazaqstan oblysynda shomylýǵa bolmaıtyn sý aıdyndarynyń jaǵalaýlaryna tyıym salý belgisi ornatylyp jatyr, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, óńir boıynsha shomylýǵa ruqsat etilmegen 64 oryn anyqtalǵan.
Jalpy oblystaǵy sý aıdyndarynyń jaǵalaýyna 85 tyıym salý belgisi ornatyldy.
Aldaǵy ýaqytta taǵy 200-ge jýyq belgi ornatý josparlanyp otyr.
Bul shara halyqqa sýǵa shomylýdyń qaýpin túsindirý úshin qolǵa alynyp otyr.
Belgi ornatylǵan sý qoımalarynyń aǵyny qatty, túbi tekserilmegen jáne jaqyn mańda qutqarý nemese medıtsınalyq beketter joq.
«Ózen-sýdaǵy qaıǵyly oqıǵalardyń aldyn alý úshin qutqarýshylar demalys bazalarynyń ıelerine túsindirý jumystaryn júrgizýde. Naqty aıtqanda, sýdaǵy qaýipsizdik erejelerin saqtaý qajettigi, qoǵamdyq qutqarýshylardy oqytýǵa ótinishter berý týraly 193 hat joldanǵan. Osy rette, aımaq jurtshylyǵyna qaýipsizdik belgilerin nazardan tys qaldyrmaı, ruqsat etilgen jaǵajaılarda ǵana sýǵa shomylý kerektigin eskertemiz» dep habarlady vedomstvo ókilderi.
Aıta keteıik, 2021 jyldyń basynan beri oblysta 4 adam sýǵa batyp ketken.
