Shyǵys Qazaqstanda bıyl 32 kólik órtendi

ÓSKEMEN. QazAqparat – Shyǵys Qazaqstan oblysynda jyl basynan beri 32 kólik órtendi, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, óńirde bıyl 32 avtokólik otqa oranǵan. Sońǵy oqıǵa Óskemendegi Tselınnaıa kóshesinde boldy.

«Turaqta toqtap turǵan «Toyota RAV 4» markaly kólikten órt shyqqan. Oqıǵa ornyna órt sóndirýshiler shuǵyl kelip jetti. Sol kezde kabınany, salondy, qozǵaltqysh bóligin, aspaptar paneli men dóńgelekterdiń shınalary janyp ketti», - delingen aqparatta.

Kóp uzamaı aýmaǵy 6 sharshy metrdi quraǵan tilsiz jaý tolyqtaı aýyzdyqtaldy. Aldyn ala derek boıynsha ottyń shyǵýyna qaýiptiligi joǵary agregatpen jumys atqarý kezindegi kemshilik bolǵan.

Osy rette, TJD qyzmetkerleri avtokólik ıelerine órt qaýipsizdigi erejelerin saqtaýdy eske saldy:

- Kólikti tehnıkalyq tekserýden ýaqytyly ótkizińiz.

- Kólik salonynda árqashan eki lıtrli untaqty órt sóndirgish bolýy kerek. Onyń jaramdylyq merzimin tekserińiz.

- Barlyq elektr jabdyǵynyń jaramdylyǵyn baqylańyz.

- Motor bóliginde bógde, tez tutanatyn zattardy, shúberekterdi, kartondardy saqtamańyz.

- Janar-jaǵarmaıdy tek germetıkalyq ydystarda tasymaldaýǵa bolady.