Shyǵys Qazaqstanda bıyl 21 sporttyq nysan boı kótermek
ÓSKEMEN. QazAqparat – Shyǵys Qazaqstan oblysynda bıylǵy jyly 21 sporttyq nysan salynady, dep habarlaıdy QazAqparat tilshisi.
Shyǵys Qazaqstanda sportty damytýǵa erekshe kóńil bólinýde. Bul týraly halyq aldynda esep bergen aımaq basshysy Danıal Ahmetov atap ótti.
«Koronavırýs pandemııasyna qaramastan óńir sportshylary halyqaralyq jáne respýblıkalyq jarystarda 2 myńnan astam medal ıelendi. Jastardy salaýatty ómir saltyna shaqyrý maqsatynda 6 sport nysany, atap aıtqanda Aıagóz aýdanynyń Aqtoǵaı kentinde, Jarma aýdanynyń Shar qalasynda, Kókpekti aýdanynyń Kókpekti aýylynda jáne Úrjar aýdanynyń Maqanshy aýylynda dene shynyqtyrý-saýyqtyrý kesheni paıdalanýǵa berildi. Sondaı-aq Kúrshim men Úrjar aýdandarynda júzý basseınderi salynǵan», - dedi oblys ákimi.
Onyń aıtýynsha, bıyl 21 sport nysany boı kóteredi. Atap aıtqanda, burynǵy toǵyz aýdan ortalyǵynda balalar sport mektepteri ashylady. Budan bólek, Marqakól, Katonqaraǵaı, Úlken Naryn, Samar, Tavrııa, Bozanbaı, Aıyrtaý, Aqsýat, Borodýlıha, Qaınar aýyldarynda jáne Serebrıansk, Shemonaıha, Aıagóz qalalarynda 13 dene shynyqtyrý-saýyqtyrý kesheni salynbaq.
Kúrshim aýdanynyń Qaljyr aýyly men Úrjar aýdanynyń Qabanbaı aýylynda eki sport modýlin ashý josparlanyp otyr. 2021 jyly oblys mektepterindegi sport sektsııalarynyń sanyn 1268-ge kóbeıtemiz. Dene shynyqtyrý muǵalimderi bul jumys úshin ústemaqy alatyn bolady», - dedi Danıal Ahmetov.
