Shyǵys Qazaqstanda bıyl 19 kópir salyndy
ÓSKEMEN. QazAqparat – Shyǵys Qazaqstan oblysynda bıyl 1 074 shaqyrym jol jóndelýde, dep habarlaıdy QazAqparat tilshisi.
Óńirde respýblıkalyq mańyzy bar joldardyń jalpy uzyndyǵy – 3 414 shaqyrym. Bıyl onyń 1 074 shaqyrymy jóndelip jatyr. Bul jaıly baspasóz konferentsııasy barysynda «QazAvtoJol» AQ Shyǵys Qazaqstan oblysyndaǵy fılıalynyń dırektory Asylbek Nuǵmanov málimdedi.
«Bıyl joldardy qaıta jańartýǵa, kútip-ustaýǵa, kúrdeli jáne ortasha jóndeýge 33 mlrd teńgeden astam qarajat bólingen. «Nurly jol» baǵdarlamasy aıasynda jalpy uzyndyǵy 869 shaqyrym bolatyn «Taldyqorǵan-Qalbataý-Óskemen» jáne «Qalbataý-Maıqapshaǵaı» syndy eki mańyzdy kólik dálizin rekonstrýktsııalaý jalǵasýda», - dedi ol.
Asylbek Nuǵmanovtyń aıtýynsha, búgingi tańda jobalarǵa sáıkes 490 shaqyrym asfalt-beton jabyndysy men 600 shaqyrym joldyń negizi qalanyp, úsh kólik aıryǵy, 19 kópir jáne 375 sý ótkizý qubyry salyndy.
«Bıyl respýblıkalyq mańyzy bar «Taskesken-Baqty» tasjolynyń 20 shaqyrymy paıdalanýǵa berildi. Katonqaraǵaı aýdanyndaǵy Berel aýyly men «Rahman qaınary» shıpajaıy arasyndaǵy tórt kópirdi kúrdeli jóndeýdiń joba-smeta qujattamasyn túzetý jumystary bastaldy. Jobany iske asyrý 2022 jylǵa josparlanǵan», - dedi fılıal dırektory.
