Shyǵys Qazaqstanda bıyl 108 dala órti tirkeldi
ÓSKEMEN. QazAqparat – Shyǵys Qazaqstan oblysynda jyl basynan beri 62 orman jáne 108 dala órti tirkeldi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, bıyl óńir boıynsha 62 orman órti tirkelgen. Onyń kóbi naızaǵaı saldarynan boldy.
«Naqty aıtqanda, naızaǵaı razrıadynan – 48, otty abaısyz paıdalanýdan – 13 jáne qasaqana ot qoıýdan – 1 órt shyqty. Sondaı-aq 2165 gektar alqapta 108 dala órti tirkelip otyr», - dedi oblystyq TJD Memlekettik órt baqylaý basqarmasy bastyǵynyń orynbasary Rústem Sembaev.
Tilsiz jaýdyń aldyn alý maqsatynda arnaıy qurylǵan 69 mobıldi top 419 ret reıdke shyqqan. Sonyń nátıjesinde órt qaýipsizdigi talaptaryn buzǵan 242 adam ákimshilik jaýapqa tartyldy.
