Shyǵys Qazaqstanda bıyl 100 dáriger shetelde biliktiligin arttyrady

ÓSKEMEN. QazAqparat – Shyǵys Qazaqstan oblysynda sońǵy 5 jylda 341 medıtsına qyzmetkeri Eýropa elderinde biliktiligin arttyrdy, dep habarlaıdy QazAqparat tilshisi.

Aımaq basshysy Danıal Ahmetovtyń qatysýymen oblystyq qoǵamdyq keńestiń keńeıtilgen otyrysy ótti.

Jıyn barysynda medıtsına jáne bilim salasyna qatysty sóz qozǵaldy.

«Densaýlyq saqtaý salasyna sońǵy bes jylda mol qarjy quıyldy. Sonyń nátıjesinde, aýrýhanalarǵa zamanaýı jabdyqtar kóp alyndy. Biraq jańa jabdyqtarmen dárigerlerimiz jumys isteı alýy tıis. Sondyqtan aq halattylardyń biliktiligin arttyrý maqsatynda arnaıy baǵdarlama qabyldadyq. Sol ýaqyttan beri bes myń dáriger bilimin shyńdasa, onyń 341-i Eýropanyń úzdik klınıkalaryna baryp kelgen», - dedi ShQO ákimi.

Onyń aıtýynsha, osy baǵdarlama aldaǵy ýaqytta da jalǵasyn tabady. Bıyl 100 dáriger shetelde tájirıbe jınaqtaýǵa múmkindik almaq.

«Bilim salasyna qatysty aıtar bolsaq, qazaq tili muǵalimderiniń 49 paıyzynyń bilim deńgeıi tómen. Sol úshin aqpan aıynan bastap ustazdardy qosymsha oqytyp jatyrmyz», - dedi Danıal Ahmetov.

Esterińizge sala ketsek, osyǵan deıin Óskemendegi 19 kósheniń ataýyn ózgertý usynylǵanyn habarlaǵan edik.