Shyǵys Qazaqstanda bıyl 10 adam sýǵa batyp ketti
ShQO Tótenshe jaǵdaılar departamenti baspasóz qyzmetiniń málimetine súıensek, qutqarýshylar, polıtsııa qyzmetkerleri jáne eriktiler ózen-kól jaǵalaýlarynda reıdterdi jalǵastyrýda. Jaz shyqqaly sýdaǵy jazataıym oqıǵalardyń aldyn alý maqsatynda 2000-nan astam reıd júrgizilgen.
2022 jyldyń basynan beri óńirdegi sý aıdyndaryna 10 adam batyp ketti. Qaıǵyly jaǵdaılardyń 7-eýi shomylý maýsymynda bolǵan. Profılaktıkalyq reıdterdiń nátıjesi boıynsha QR ÁQBtK-niń 440-babymen (alkogoldi ishimdik ishý nemese qoǵamdyq orynda mas kúıde júrý) 47 azamat, 364-babymen (ortaq sý paıdalaný qaǵıdalaryn buzý) 48 adam ákimshilik jaýapkershilikke tartyldy.
«Ásirese, mas azamattardy anyqtap, jaýapqa tartýdyń – sýdaǵy jazataıym oqıǵalardyń aldyn alýda mańyzy zor. Turǵyndarǵa tek arnaıy jabdyqtalǵan jaǵajaılarda shomylý qajettigin eske salamyz. Eshqashan qaýipti jerlerge baryp, óz ómirińizge qaýip tóndirmeńiz. Tyıym salý belgileri sý túbiniń tekserilmegendigin kórsetedi», – deıdi oblystyq TJD bastyǵynyń orynbasary Arman Toqanov.