Shyǵys Qazaqstanda birqatar tasjol qaıta ashyldy
ÓSKEMEN. QazAqparat – Shyǵys Qazaqstan oblysynda birqatar tasjol qaıta ashyldy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, kún jylynyp, borannyń beti qaıtýyna oraı 4 aqpanda «Óskemen-Shemonaıha- Reseı Federatsııasynyń shekarasy» tasjolynyń 15-123 shaqyrymynda, «Glýbokoe aýyly-RF shekarasy» tasjolynda, «Óskemen-Rıdder-RF shekarasy» tasjolynyń 0-105 shaqyrymynda jáne «Óskemen-Rıdder» tasjolynda kólik quraldarynyń qozǵalysyna ruqsat berilgen.
Aıta keteıik, vedomstvo ókilderi óńir jurtshylyǵyna alys saparǵa shyǵar aldynda joldardyń jaı-kúıin «Dármen» mobıldi qosymshasy arqyly tekserip otyrýǵa keńes berdi.
Esterińizge sala keteıik, keshe boranǵa baılanysty Shyǵys Qazaqstanda birqatar tasjol jabylǵan bolatyn.
