Shyǵys Qazaqstanda bir jylda15 memlekettik qyzmetshi jaýapqa tartyldy

ÓSKEMEN. QazAqparat – Shyǵys Qazaqstan oblysynda bir jylda zań buzǵan 15 memlekettik qyzmetshi jaýapqa tartylǵan, dep habarlaıdy QazAqparat tilshisi.

Bul týraly Óskemende ótken baspasóz máslıhaty barysynda QR Memlekettik qyzmet isteri agenttigi ShQO boıynsha departamentiniń basshysy Nurlan Erkebaev aıtty.

«Abaı oblysy bólinip shyqqannan keıin Shyǵys Qazaqstanda 367 memlekettik organ men 3962 memlekettik qyzmetshi qaldy. Búginde aımaq boıynsha memlekettik qyzmette eńbek etip júrgenderdiń 33%-y erler, 67%-y áıelder. Prezıdenttiń memlekettik qyzmetke kirý jáne odan shyǵý talaptaryn jeńildetý tapsyrmasyn oryndaý aıasynda, jyl sońynda salalyq zańǵa birqatar ózgerister men tolyqtyrýlar engizilgen. Atap aıtsaq, kadr tapshylyǵy máselesi bar aýyldyq, aýdandyq deńgeılerde qyzmetke qabyldaý jeńildetildi. Memlekettik grantpen oqý oryndaryn aıaqtaǵan úzdik túlekter endi aýdan men aýylda tómengi laýazymdarǵa konkýrssyz tikeleı taǵaıyndalatyn bolady», - deıdi ol.

Memlekettik qyzmet salasyndaǵy zańbuzýshylyqtyń aldyn alý maqsatynda byltyr 68 tekserý júrgizilgen. Onyń ishinde 59-y jospardan tys tekserý, 9-y profılaktıkalyq baqylaý.

«Tekserýlerdiń nátıjesinde 459 buzýshylyq anyqtaldy. Memlekettik qyzmet salasyndaǵy zańnamany buzǵany úshin 15 laýazymdy tulǵa tártiptik jaýapkershilikke tartylyp, 3 ákimshilik is qozǵaldy», - deıdi Nurlan Erkebaev.