Shyǵys Qazaqstanda bir jarym aıda 800 tonna pishen órtenip ketti
ÚRJAR AÝDANY. QazAqparat – Shyǵys Qazaqstanda shóp jınaý naýqany bastalǵaly iri azyqty daıyndap, tasý jáne saqtaý kezindegi órt jaǵdaılary jıilep ketti, dep habarlaıdy QazAqparat tilshisi ShQO Tótenshe jaǵdaılar departamentiniń baspasóz qyzmetine silteme jasap.
Mekemedegilerdiń aıtýynsha, tamyz bastalǵaly oblysta iri azyqtyń 45 órtený jaǵdaıy tirkelse, sonyń ishinde 800 tonnadan astam pishen órtengen.
Kezekti órt Úrjar aýdanynda, Taskesken-Bahty tasjolynyń 121 shaqyrymynda boldy. Tirkemesi bar traktor ketip bara atqanda oralǵan pishen órtenip ketti.
«Júrgizýshi kóliginiń bir jeri buzylǵandyqtan toqtap, pishenniń qyzyl jalynǵa oranǵanyn baıqaǵan. Ol dereý traktordy tizbeginen ajyratyp órt sóndirýshilerdi shaqyrdy. Aýdandaǵy órt postynyń qyzmetkerleri 10 mınýt ishinde kelip, tilsiz jaýdy sóndirýge kiristi. Ókinishke qaraı, 30 sharshy metr aýmaqta 4 tonna jańa daıyndalǵan pishen men tirkemeniń bólikteri órtendi. Órt sóndirýshiler órtti 20 mınýtta sóndirdi», - dep túsindirdi ShQO TJD qyzmetkerleri.
Boljam boıynsha órtke otty abaısyz paıdalaný sebep bolǵan. Órt sóndirýshilerdiń aıtýynsha, órttiń tutanýyna janynan ótip bara jatqan avtokólikten laqtyrylǵan temeki tuqyly sebep bolýy múmkin.
Avtor: Rýslan Shaqabaev
