Shyǵys Qazaqstanda bir kúnde 40-tan astam órt sóndirildi
ÓSKEMEN. QazAqparat – Shyǵys Qazaqstan oblysynda sońǵy táýlikte 40-tan astam órt shyqty. Onyń ishinde 34 ret dala órti sóndirildi, dep habarlaıdy QazAqparat tilshisi.
ShQO TJD baspasóz qyzmetiniń málimetine súıensek, bes jaǵdaıda jalynnyń shyǵý sebebi – halyqtyń otty abaısyz qoldanýynan bolǵan.
«Kúrshim aýdanynyń ortalyǵyndaǵy Abylaıhan kóshesinde jer úıdiń aýlasyndaǵy sharýashylyq qora-jaı órtendi. Tilsiz jaý sharpyǵan jalpy aýdan 50 sharshy metrdi quraǵan. Semeı qalasyndaǵy Bazdyrev kóshesinde úıdiń shatyry, tereze men esik blogy otqa orandy. Qutqarýshylar 40 sharshy metr alańdaǵy órtti óshirdi», - delingen aqparatta.
Budan bólek, Kókpekti aýdanynda jeke turǵyn úıdiń aýlasyndaǵy qora men garaj órtengen. Qyzyl jalyn garaj ishinde turǵan 1976 jylǵy «VAZ2101» avtokóligin sharpydy. Kók tútinnen 11 bas qoı, 9 qozy ólgen. Órttiń shyǵý sebebi - elektr jabdyqtaryn montajdaý jáne paıdalaný kezinde qaýipsizdik talaptaryn saqtamaý.
Bir kún ishinde oblys aýmaǵynda 34 ret shóp jandy. Sol jerlerge shuǵyl kelip jetken departament qyzmetkerleri tilsiz jaýdy sóndirgen.
Esterińizge sala ketsek, osyǵan deıin ShQO-da jol apatyna túsip, kólikke qystyrylyp qalǵan áıel qutqarylǵanyn habarlaǵan edik.
