Shyǵys Qazaqstanda bir kúnde 26 dala órti tirkeldi
ÓSKEMEN. QazAqparat – Shyǵys Qazaqstan oblysynda bir kúnde 26 dala órti tirkeldi, dep habarlaıdy QazAqparat tilshisi.
ShQO TJD baspasóz qyzmetiniń málimetine súıensek, sońǵy bir táýlik ishinde óńir boıynsha 26 dala órti tirkelgen. Kóp jaǵdaıda órt ashyq alańda, saıajaılar mańynda boldy. Órttiń shyǵý sebebi – azamattardyń otty abaısyz qoldanýy.
«Qutqarýshylar Altaı aýdanyndaǵy jalpy aýdany 28 gektar, Kókpekti aýdanyndaǵy 25 gektar, Úrjar aýdanyndaǵy 20 gektar jáne Tarbaǵataı aýdanyndaǵy 20 gektar aýmaqtaǵy shóp pen qamysty sharpyǵan órtti aýyzdyqtady. Ǵaryshtan jasalatyn monıtorıngtiń kómegimen departament qyzmetkerleri bıyl 222 termonúkteni anyqtady. Osynyń nátıjesinde, sol jerlerde órttiń ary qaraı taralýyna jol berilmeı, dereý sóndirildi», - delingen aqparatta.
Oblysta tilsiz jaýdyń aldyn alý úshin quramyna qutqarýshylar, jergilikti atqarýshy organ ókilderi men polıtseıler kiretin mobıldi toptar qurylǵan. Jyl basynan beri olar órt qaýipsizdigi erejelerin saqtamaı, shóp órtegeni úshin 11 adamdy jaýapqa tartty. Salynǵan aıyppuldyń jalpy mólsheri – 336 930 teńgeni quraıdy.
Esterińizge sala ketsek, osyǵan deıin Shyǵys Qazaqstanda jyl basynan beri 47 kólik órtengenin habarlaǵan edik .
