Shyǵys Qazaqstanda balasyna alıment tólemeı júrgen 25 adam anyqtaldy

ÓSKEMEN. QazAqparat – Shyǵys Qazaqstan oblysynda jyl basynan beri balasyna alıment tólemeı júrgen 25 boryshker anyqtaldy, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, tártip saqshylary bıyl balasyna alıment tólemeı júrgen 25 adamdy anyqtady.

Máselen, Óskemen qalalyq PB kóshi-qon qyzmeti bólimine jeke sot oryndaýshysynan kámeletke tolmaǵan balalaryn asyraýǵa alıment tólemegen jáne olarǵa 1 000 000 teńgeden astam qaryz bolǵan er adamǵa izdeý jarııalaý týraly qaýly kelip túsken.

«Іzdeý sharalary barysynda kóshi-qon qyzmetiniń mamandary bir táýlik ishinde boryshkerdiń qaıda ekenin anyqtady. Endi sot oryndaýshylary qaryzdy óndirip alady», - delingen aqparatta.

Osy rette, kóshi-qon qyzmeti alıment tóleýden jaltarǵandar úshin zańda ákimshilik (QR ÁQBtK-niń 669-baby) jáne qylmystyq jaýaptylyq (QR QK-niń 139-baby) kózdelgenin eskertedi.