Shyǵys Qazaqstanda bala asyrap alýdyń jańa tártibi túsindirildi
ÓSKEMEN. QazAqparat - Óskemendegi A.Pýshkın atyndaǵy oblystyq kitaphanada «Bala asyrap alý jónindegi ulttyq agenttik» jobasynyń jetekshisi Lázzat Júsipovamen kezdesý ótti, dep habarlaıdy QazAqparat.
Shara barysynda «Neke jáne otbasy týraly» kodekske engizilgen birqatar ózgertýler talqylanyp, bala asyrap alý úshin sertıfıkatqa qalaı qol jetkizý qajettigi jiti túsindirildi.
«Ózderińiz biletindeı, ótken jyly «Ana úıi» qoǵamdyq qorynyń janynan Bala asyrap alý jónindegi ulttyq agenttik quryldy. Kodekske birqatar ózgerister engizildi. Sóıtip, jeke bala asyrap alý agenttikteri zańdastyryldy. Budan bólek, bala asyrap alýshylar eń aldymen ata-ana mektebinde oqyp, sertıfıkat alýy mindetteldi», - dedi Lázzat Júsipova.
Esterińizge sala keteıik, «Neke jáne otbasy týraly» kodekske engizilgen ózgertýler 2020 jylǵy 1 shildeden bastap kúshine enedi. Búginde Bilim jáne ǵylym mınıstrligi bala asyrap alý agenttikterin tirkeýden ótkizýdiń erejesin ázirleýde.
«Elimizdiń barlyq oblysyndaǵy «Ana úıi» janynan asyrap alýshylar mektebi ashyldy. Onda kelýshilerge bala asyrap alý sharttary men tártibi túsindiriledi. Sonymen qatar ata-ana bolýǵa psıhologııalyq jaǵynan daıyndalýǵa kómek kórsetiledi. Máselen 2016-2019 jyldar aralyǵynda Shyǵys Qazaqstan oblysyndaǵy asyrap alýshy ata-analar mektebinde 140 adam tálim aldy. Nátıjesinde 66 adam 86 balany qamqorlyqqa aldy», - deıdi Lázzat Júnisova.
