Shyǵys Qazaqstanda azyq-túliktiń 8 túri qymbattady
Óńirde áleýmettik mańyzy bar azyq-túlik baǵasynyń negizsiz ósýine jol bermeý maqsatynda turaqty túrde oblystyq shtab otyrysy ótkizilýde. Alaıda soǵan qaramastan jyl basynan beri Shyǵys Qazaqstanda taýar baǵasynyń ındeksi respýblıkalyq kórsetkishten 0,4 paıyzǵa joǵary bolyp otyr.
ShQO Kásipkerlik jáne ındýstrıaldy-ınnovatsııalyq damý basqarmasynyń málimetinshe, bıyl Óskemende sábiz, kartop, qyryqqabat, pııaz, kúnbaǵys maıy, taýyq eti, qaraqumyq jarmasy jáne qant qymbattaǵan.
«Azyq-túlik qunyna únemi monıtorıng júrgizilip, baǵany turaqtandyrý maqsatynda túrli sharalar qolǵa alynýda. Máselen, un, qant, jumyrtqa men kókónis baǵasyn turaqtandyrý úshin «Krýpnoff», «Agrofırma «Prırechnoe», «Semey Qus» JShS-laryna memleket tarapynan nesıe berildi. Olardyń ónimderi Óskemen, Semeı qalalaryndaǵy «Ertis» áleýmettik-kásipkerlik korporatsııasynyń saýda pavılondarynda bekitilgen baǵamen satylyp jatyr», - deıdi basqarma basshysynyń orynbasary Olga Grıgoreva.
Sonymen qatar «Ertis» korporatsııasy 3 myń tonna kartop pen 400 tonna sábiz saýdalaýda. Jalpy Shyǵys Qazaqstan boıynsha 44 áleýmettik dúken jumys isteıdi.